Autoridade Rejiaun Administrativa Espesial Oé-Cusse Ambeno, (RAEOA) no Zona Espesial Ekonómia Sosiál no Merkadu (ZEESM TL) reprezenta Sekretáriu Rejionál Adjunta PA Asuntu Reforsu Institusionál S. E. Leonia da Costa Monteiro, hamutuk ho Ministru Komersiu S.E Augusto Júnior Trindade no Reprezentante UNDP Sra. Caltlin Wiesen akompaña hosi Membru Autoridade iha tersa-feira ne’e partisipa iha selebrasaun asina kontratu ho benefisiáriu Kompetisaun Negosiu Inovativu- KNI na’in 51 iha Otél Oéupu suku Costa Sub-rejiaun Pante Makassar.

Programa Kompetisaun Negosiu Inovativu- KNI implementa hosi UNDP ne’ebé hetan subvensaun públika iha Ministériu Komersiu no servisu hamutuk ho Autoridade RAEOA liuhosi Sekretáriu Rejionál Asuntu Komersiu no Industria atu suporta joven emprendedór sira atu dezenvolve no diversifika ekonomia azúl no ekonomia matak iha rai laran.

Sekretáriu Rejionál Adjunta PA Asuntu Reforsu Institusionál S. E. Leonia da Costa Monteiro parabéns ba benefisiáriu na’in 51 ne’ebé liu selesaun Kompetisaun Negosiu Inovativu tanba liuhosi prosesu naruk ida no ohin selebra asina kontratu hodi hetan fundu implementa sira nia planu ne’ebé submete ona.

Tanba ne’e husu benefisiáriu sira atu hadi’a jestaun negósiu ho kualidade nune’e bele susesu hodi fó oportunidade ba maluk sira seluk iha faze tuir mai. Programa KNI atu kontinua presiza benefisiáriu sira nia jestaun ne’ebé di’ak.

Adjunta mós argumenta programa ne’e importante tebes ba RAEOA, tanba rai atu muda an ho lais presiza hametin ekonomia família, mak tenke kria negósiu ki’ik no nia merkadu maka ita ho ita maka sosa sasán ba malu. Entaun programa KNI atu motiva ema hodi bele kria servisu ba an rasik duke simu saláriu hosi ema seluk. Inisiativa hirak ne’e atu reforsa hodi hamenus importasaun produtu hosi rai seluk.

Autoridade RAEOA halo esforsu makas dezenvolve infraestrutura báziku hanesan estrada urbana, no estrada rurál sira hodi ajuda movimentu komunidade ba sirkulasaun ekonomia.

Foin sa’e sira ne’ebé mai ho ideia úniku kreativu no inovativu sai emprendedór hamutuk na’in 57 ne’ebé liu iha verifikasaun hodi bele tuir pre-kaulifikasaun kompetisaun Negosiu Inovativu (KNI). Enkuantu rezultadu verifikasaun kualifikasaun iha emprendedór na’in 12 sai kualifikasaun di’ak hodi halo aprezentasaun ba planu negósiu ki’ik iha kompetisaun Negosiu Inovativu, ba iha setór Agrikultura, Komersiu, Industria, Turizmu, Teknolojia Inovativu. Rezultadu hosi aprezentasaun emprendedór na’in 12 iha kompetisaun refere maka emprendedór na’in 6 sai vensedór no hetan prémiu ho valór osan $500.00-3.000.00.

kompetisaun ne’e oferese ba foin-sa’e sira ne’ebé mai ho ideia úniku, kreativu no inovativu ho objetivu atu promove fó apoiu kapasitasaun no ekipamentus ba Foin-Sa’e sira ho intensaun atu motiva no inspira sira investe iha setór produtivu hanesan Agrikultura, Peskas, Komérsiu, Indústria, Turismu, Teknolojia no Inovasaun Ai-han ne’ebé orienta ba impaktu sosiál no fó valór aas ba ekonomia rai laran hodi kontribui rezolve problema sosiál komunidade nian.