RAEOA; Kinta-feira, loron 16 Fulan Novembru 2023
S. E Sekretáriu Rejional Comercio no Industria, Eng. Pedro da Cunha Boquifai da Silva hamutuk ho NGO FONGTIL reprezenta hosi Diretor Yayasan HAK Sr. Feliciano da Costa de Araujo, no parseiru SASCAS abertura sosializa Auditoria sosiál ba entidade iha Hotel Oéupu, Suku Costa, Sub-rejiaun Pante Macassar.
Objetivu husi Sosializasaun atividade Auditoria atu garante transparénsia no responsabilidade ba iha ezekusaun projetu ne’ebé hetan fundu husi Governu. Diretór Yayasan HAK, Feliciano da Costa de Araujo haktuir katak Auditoria Sosial estabelese ho objetivu atu garante Servisu nakloke ba sosiedade, hanesan implementasaun projetu sira iha setór edukasaun, saúde, Agrikultura no Infraestrutura husi Governu no mós kompañia sira ne’ebé manán projetu hirak ne’e, tenke halo ho responsabilidade no garante transparénsia.
Nia hatutan katak Tamba ne’e Servisu Auditoria Sosial, Governu, sosiedade sivíl no komunidade toma responsabilidade atu hala’o fiskalizasaun no avaliasaun ba Nia impaktu Sosial katak atividade projetu hirak ne’e atu garante duni transparénsia, akontabilidade, lealdade ba regulamentu BoQ ho Metan atu atinji sustentabilidade.
Koordenadór Consellu Diretiva Rede Nasional CD- RNas, Sr. Joni Juliano haktuir katak papél CD-RNas atu apoiu no promove Auditoria Sosial iha territoriál nasionál, inklui mós fó asisténsia tékniku ba organizasaun sira ne’ebé atu implementa Auditoria Sosial exseeptu RAEOA mak seidauk estabelese. Tanba ne’e, Auditoria Sosial ne’e rasik servisu konjunta, dezde 2002 to’o 2014 sosiedade sivíl hala’o servisu reference maibé iha VI Governu estabelese Auditoria Sosial hodi envolve entidade hotu inklui komunidade atu bele halo avaliasaun ba implementasaun projetu sira iha área edukasaun, Agrikultura no saúde.
Nia hatutan liu tan katak Auditoria Sosial nu’udar espasu ba komunidade no sosiedade sivíl atu hato’o preokupasaun ba Governu atu halo dezenvolvimentu di’ak liu no garante sustentavel.
Sekretáriu Rejional Comercio no Industria, Eng. Pedro da Cunha Boquifai da Silva iha Nia intervensaun abertura nian haktuir katak nu’udar membru Autoridade hakarak kongratula Nai Xefi ne’ebé eleitu sira, no Bemvindu ba NGO FONGTIL ne’ebé mak iha inisiativa atu realiza Sosializasaun Auditoria Sosial iha RAEOA.
Tuir Nia katak Auditoria Sosial ne’e Servisu konjunta, liuliu Nai Xefi Suku no komunidade iha responsabilidade morál atu halo kritika bainhira projetu sira implementa la tuir dalan ka BoQ ne’ebé mak iha, Xefi Suco no komunidade tenke fiskaliza, tanba ne’e labele hein de’it Governu no Parlamentu de’it. Nia informa Liu tan katak Nai Xefi Suco ho komunidade Malelat mak hatudu duni sira nia responsabilidade morál hodi fiskaliza projetu on going iha Suco Malelat, no asaun ne’e ezemplu di’ak ba Oekusi oan tomak, tenik Nia.
Entretantu iha VI Governu Constitutional hamutuk NGO sira harii ona Konsellu Diretiva Rede Nasional – CD RNas ne’ebé envolve organizasaun Water Aid, ETADEP, UNTL, RENETIL, Alola Foundation, ADTL no CODIVA hodi hala’o Servisu ba Auditoria Sosial iha Timor laran
Média GPA
José Mala
