S.E. Prezidente Autoridade Rejiaun Administrativu Espesial Oe-cusse Ambenu (RAEOA) no Zona Espesial Ekonomia Sosial Merkadu (ZEESM) Timor-Leste Arsénio Paixão Bano, akompaña hosi S.E Sekretáriu Rejionál Adjuntu PA Asuntu Sosiais Sr. Maximiano Neno, S.E Sekretáriu Rejionál Asuntu Edukasaun no Solidariedade Sosial Sra Abelina da Costa, enkontru ho Diretor Ra’es Hadomi Timor Oan Sr. Joãozito dos Santos ho ekipa ko’alia kona-ba preparasaun komemorasaun mundiál ema ho defisiente iha loron 3 dezembru sei realiza iha RAEOA.

Diretór Ra’es Hadomi Timor Oan (RHTO) Joãozito dos Santos relata katak RHTO kada tinan komemora loron mundiál ba ema ho defisiente iha Nasional no iha munisípiu sira no tinan ne’e sei komemora iha RAEOA.

Ohin mai hasoru Prezidente Autoridade atu relata kona-ba preparasaun atividade ba komemorasaun loron mundiál ba ema ho defisiente ho kalendáriu atividade hanesan séminar, feira, misa agradesimentu, no marsa. Aleinde ida ne’e ami mós hakarak konvida Prezidente Autoridade RAEOA no ZEESM TL atu sai oradór ba iha séminar refere.

Nia salienta tan katak husu disponibilidade Prezidente Autoridade RAEOA atu entrevista eskluziva atu fó mensajen ida kona-ba loron mundiál ema ho defisiente. Orsamentu ba komemorasaun ne’e RHTO prevee 8 míl maibé seidauk kobre nune’e husu Autoridade iha posibilidade bele apoiu ba akomodasaun inklui lojístika ba mobiliza defisiente hamutuk ema na’in 100 ida sei partisipa iha eventu refere.

Entretantu Prezidente Autoridade RAEOA no ZEESM TL Arsénio Paixão Bano, hatete katak RAEOA iha interese ba atividade komemorasaun loron mundiál ema ho defisiente no enkoraja sira ba esforsu hotu.

Organizasaun RHTO hanesan organizasaun ida ne’e fokus liu ba ema ho defisiente ohin ko’alia kona-ba preparasaun komemorasaun loron mundiál ba defisiente, organizasaun hili RAEOA atu halo komemorasaun iha inísiu fulan dezembru durante loron tolu.

Ami ih interese boot hosi parte RAEOA nian tanba labele husik ema ida iha kotuk defisiente asuntu ida ida ne’ebé luta la hotu no ha’u hatene di’ak defisiente sira la’ós mai husu karidade no sira la presiza kasian (kuitadu) sira merese respeita hosi governante, povu no komunidade iha uma laran katak sira hanesan ho ita (umanu). Partisipa iha eventu sei mai hosi ema ho defisiente no embaixada Australia.