Sua Exelensia Prezidente Autoridade Rejiaun Administrativu Espesial Oe-cusse Ambenu (RAEOA) no Zona Espesial Ekonomia Sosial Merkadu (ZEESM) Timor-Leste Arsénio Paixão Bano, akompaña hosi Sekretáriu Rejionál Asuntu Komersiu no Industria Sr. Pedro da Cunha B. da Silva no Xefe Departamentu Estrada Ponte Controllu e Cheias Sr. Camilo D. J. Quefi, kinta-feira ne’e vizita projetu reabilitasaun estrada rurál tolu ne’ebé servisu la’o hela iha suku Abani liga ba suku Malelat Sub-rejiaun Passabe no ida hosi Malelat liga ba Cusi Suku Banafi Sub-rejiaun Nitibe.

Objetivu hosi vizita ne’e Prezidente Autoridade atu hare direta progresu servisu reabilitasaun estrada hirak ne’e nia progresu servisu no fó korajen atu aselera servisu tanba tempu besik udan ona. Nune’e iha tempu udan estrada ne’e bele ajuda asesu movimentu komunidade sira lori produtu ba merkadu.

Entretantu estrada rurál ligasaun hosi Passabe ba Aldeia Haemnanu ezekuta hosi kompañia Ays Tono Unip Lda ho valór kontratu 296,252.35 atinji ona 45% distánsia kilómetru 2, orsamentu ba projetu refere prevee hosi OJE 2021.

Entretantu estrada rurál hosi Aldeia Haimnanu suku Abani liga Suku Malelat iha loke 2 no lote 3 ne’ebé ezekuta hosi kompañia Am-Lhichoe Unip. Lda hatudu progresu di’ak tebes iha lote2 atinji 60,47% no iha lote3 atinji 50,30%.

Konstrusaun estrada rurál hosi Aldei Haemnanu Abani pakote lote2 ho distánsia kilómetru 2, 200 no lote3 distánsia kilómetru 2,400 ho valór kontratu lote2 622, 244. 44 no lote3 valór kontratu 491, 895,57, ho durasaun servisu tinan ida. Autoridade RAEOA prevee orsamentu ba projetu refere hosi Orsamentu jerál Estadu 2023.

Projetu ne’e servisu la’o ho di’ak tanba kompañia iha kooperasaun di’ak ho Autoridade lokál no komunidade hodi kontribui ba dezenvolvimentu. Kompañia Am-Lhochoe rekruta traballadór servisu iha projetu pakote rua ne’e hamutuk 121 pesoás hosi komunidade suku Malelat no Abani ba servisu iha projetu refere.

Aleinde ida ne’e mós vizita projetu reabilitasaun estrada rurál iha estrada rurál husi Cusi Suku Banafi- Malelat ne’ebé manán hosi kompañia CP Unip Lda atinji 50%, ho prezensa ne’e Prezidente Autoridade fó orientasaun ba tékniku sira atu termina kontratu halo levantamentu progresu halo pagamentu tuir progresu servisu ne’ebé iha no entrega ba kompañia manán II.

Media GPA
José Mala