RAEOA; 18 Outubru 2023
S.E. Prezidente Autoridade Rejiaun Administrativu Espesial Oe-cusse Ambenu (RAEOA) no Zona Espesial Ekonomia Sosial Merkadu (ZEESM) Timor-Leste Arsénio Paixão Bano, akompaña Xefe Gabinete PA Sra. Maria José Reis, enkontru ho Diretora Ezekutivu Alfela Sra. Marcelina Amaral iha Dominikana St. Rosa Suku Costa Sub-rejiaun Pante makassar.
Prezidente Autoridade RAEOA Afirma katak Autoridade RAEOA koopera ho organizasaun naun- guvernamental sira atu implementa asuntu inkluzaun sosiál no asesu justisa iha RAEOA.
Autoridade RAEOA parseira ho Alfela tanba ita iha problema boot ho kazu violénsia doméstika inklui violénsia kontra feto no labarik nune’e RAEOA koopera ho Alfela fó asisténsia diretu asesu justisa tanba atribuisaun kompeténsia justisa iha nasionál no RAEOA labele fó asisténsia ba vítima asesu iha justisa entaun tenke liuhosi organizasaun sosiedade sivíl sira.
Ohin enkontru ne’e atu rona progresu servisu no dadus ne’ebé ba rejista iha durante ne’e no ema na’in hira maka asesu ona sosializasaun informasaun ba lei sira, tanba ne’e RAEOA simplesmente hakarak hatuun númeru violénsia doméstika entaun tenke fó asisténsia ba sira.
Iha ámbitu ne’e mós Alfela husu apoiu orsamentu adisionál no orsamentu ba tinan fiskál 2024 nian no daudaun ne’e iha hela preparasaun kousting orsamentu 2024 ita sei hare saida maka bele apoiu tanba progresu servisu la’o duni no fó asisténsia legál ba vítima inklui ajuda setór justisa iha RAEOA.
Entretantu Diretora Ezekutiva Alfela Marcelina Amaral afirma katak enkontru ohin ne’e atu relata relatóriu progresu ezekusaun orsamentu ne’ebé apoiu hosi Autoridade inklui reabilitasaun edifísiu Alfela RAEOA nian no husu mós ajuda orsamentu adisionál atu bele finaliza reabilitasaun konstrusaun edifísiu Alfela, no aprezenta mós planu Alfela sei realiza kampaña loron ativizmu 16 days iha RAEOA ne’ebé sei monu iha loron 25 novembru to’o loron 10 dezembru 2023.
Media GPA
José Mala
