February 24, 2024 2:52 pm
Prezidente RAEOA hamutuk ho SEII abertura Kampaña loron 16 ativizmu kontra Violénsia hasoru feto no labarik

Prezidente RAEOA hamutuk ho SEII abertura Kampaña loron 16 ativizmu kontra Violénsia hasoru feto no labarik

RAEOA: 24 Outubru 2023
S E Prezidente Autoridade Rejiaun Administrativu Espesiál Oé-cusse- Ambeno, Zona Espesiál Ekonomia Sosiál no Merkadu Timor-Leste (RAEOA-ZEEMS), Sr. Arsenio Paixão Bano, hamutuk ho Sekretária Estadu ba Igualdade, Sra. Elvina Sousa Carvalho, halao abertura ba Kampaña Loron 16 Ativizmu Kontra Violénsia Hasoru Feto no Labarik-Feto, Otél Oé-Upu.
Iha biban Prezidente Autoridade RAEOA-ZEEMS, Sr. Arsenio Paixão Bano hateten katak violénsia doméstika iha RAEOA aas duni tuir dadus neebé fó-sai tanba feto Oé-Cusse iha konxiénsia makaas hodi hatoo keixa wainhira akontese violénsia hasoru feto no labarik. Prezidente RAEOA mós subliña katak ida-nee tanba esforsu makaas neebé parte hotu halo liuliu sosiedade sivíl ka ONG lokal iha Oé-Cusse neebé realiza programa sosializasaun hodi sensibiliza komunidade atu hatoo keixa tanba violénsia nee krime públika.
Prezidente RAEOA mós haktuir katak Autoridade RAEOA hamutuk ho ONG sira inklui SEI halo ona programa lubuk hodi apoiu feto sira liuhusi programa empoderamentu ekonómiku feto neebé husi tinan 2 liubá no tinan hirak tuirmai nee apoiu ba grupu sira kontinua sae. Esforsu ida-nee RAEOA halo hodi oinsá bele apoiu inan feton sira ekonomikamente labele dependénsia ba iha sira-nia parseiru hodi kontribui ba iha hamenus Violénsia uma-laran.
Prezidente RAEOA subliña liután katak iha RAOEA feto barak mak envolve an iha servisu oioin neebé durante nee mane deit mak bele halo no ida-nee hatudu katak feto nia partisipasaun iha mudansa ba iha dezenvolvimentu RAEOA nian.
Iha tinan 2 liubá iha grupu 34 hetan apoiu valor orsamentu $91 mil no iha tinan tuir mai apoiu tan grupu no agora atividade iha grupu lao hela. Sé ita haree, iha fatin hirak iha Oé-Cusse feto sira barak mak halo servisu neebé uluk sira la halo, liuliu iha servisu projetu nian, feto barak mak agora hili fatuk no seluseluk tan, Prezidente RAEOA, Señór Arsenio haktuir.
Entretantu Sekretária Estadu ba Igualdade, Sra. Elvina Sousa Carvalho haktuir katak razaun Kampaña loron 16 ida-nee realiza iha RAEOA tanba tuir dadus neebé iha hatudu katak Oé-Cusse hanesan fatin ida-neebé númeru kazu violénsia aas liu okupa fatin datoluk iha Timor laran tomak, tanba nee mak abertura ba kampaña loron 16 ativizmu kontra violénsia hasoru feto no labarik-feto hahú iha fatin ida-nee. Akresenta liután katak kazu neebé aas la signifika katak laiha esforsu neebé halo husi Autoridade RAEOA atu kombate violénsia sira maibé feto sira tenke hatene nia papél no wainhira akontese violénsia ruma nia tenke ba hatoo keixa.
Sekretária Estadu mós salienta katak hafoin abertura ba kampaña nee, durante loron 16 nia laran, SEI hamutuk ho parseiru sira hotu sei halao atividade kampaña iha terrítoriu laran hodi halo sosializasaun no hasae konxiénsia kamunidade sira kona-ba lei no polítika atu prevene no kombate violénsia hasoru feto no labarik-feto no oinsá halo ligasaun saudável ho família, komunidade no iha fatin eskola no mós iha servisu fatin.
Violénsia hasoru feto no labarik-feto no grupu vulnerável sira hanesan violasaun direitu fundamentál neebé hakanek ema-nia direitu no ema-nia dignidade hanesan umanu, Exelénsia Elvina haktuir.
Ita hotu ohin iha fatin ida-nee kontinua ho firme atu tau esforsu hamutuk atu investe iha família hodi prevene no kombate violénsia hasoru feto no labarik-feto. Família tenke sai fatin neebé seguru ba feto hotu atu moris seguru no dignu, Mai ita hotu investe iha família hodi prevene no kombate violénsia no hateten Lae ba Violénsia.
Kampaña loron 16 Ativizmu Kontra Violénsia Hasoru Feto no Labarik-Feto hahú kedas ho Jogu amizade Futsal Feto no Mane entre RAEOA-ZEEMS no SEI, Abertura no lansamentu materiál kampaña, Diálogu, Marsa hahú kedas ho kampaña utiliza Tum-Tum hamutuk 150 ba komunidade haleu Pante Makasar, FEIRA ba Produtu Grupu Benefisiáriu Feto RAEOA nian no konsertu neebé organiza husi ONG HAMNASA no FEEO RAEOA.
Kampaña loron 16 Ativizmu Kontra Violénsia Hasoru Feto no Labarik-Feto hahú ohin loron no sei ensera iha loron 10 fulan-dezembru tinan 2023 hamutuk ho loron Direitu Umanus nian. Kampaña loron 16 Ativizmu Kontra Violénsia Hasoru Feto no Labarik-Feto hetan apoiu husi RAEOA-ZEEMS, Programa Austrália TAF-NABILAN, HAMNASA, FEEO, UN Women Inisiativa Spotlight no Orsamentu SEI nian rasik.

Partisipante iha abertura ba Kampaña loron 16 Ativizmu Kontra Violénsia Hasoru Feto no Labarik-Feto partisipa husi Segundu Vise-Sekretária Meza PN Distinta Deputada Sra. Bendita Moniz Magno, Distinta Deputada Parlamentu Nasionál, Sra. Maria Rosa da Camara Bisoi; Distintu Deputadu Sr. Firmino Taequi, parseiru Liña Ministériu sira hanesan MPIE; Komisáriu Komisaun Funsaun Públika; Defensoria Públika, Sra. Marçia Sarmento; Komisária CNE, Sra. Odete Belo; Primeira Sekretária Dezenvolvimentu Umanu husi Embaixada Austrália iha Timor-Leste, Sra. Felicity Errington, Xefe Ekipa Programa Nabilan, Sra. Xylia Ingham, Reprezentante husi Embaixada Amerika, reprezentante UN Women, Institusauan Seguransa no Defeza PNTL no F-FDTL, Parseiru Dezenvolvimentu Nasionál no Internasionál no Komunidade RAEOA.

Media GPA
José Mala

0 0 votes
Article Rating
Subscribe
Notify of
guest
0 Comentário
Inline Feedbacks
View all comments
Scroll to Top

V i s a u n

Estabelesimentu área espesiál ekonomia merkadu sosiál nian ne’ebé sei funsiona hanesan incubator ba governasaun polítika governasaun nian ne’ebé bele implementa hanesan instrumentu hodi lori dezenvolvimentu globál no Integradu Republika Demokratika Timor-Leste.

M i s a u n

Kria, jere no promove área espesiál sira ekonomia sosiál nian ho modelu governasaun nian ne’ebé bele funsiona hanesan polítika dezenvolvimentu sustentavel, investimentu sustentavel no atrativu, bazeia ba konseitu entreprende, dinámika no inovasaun ne’ebé bele implementa.

O b j e t i v o

Not Found

S t r u t u r a

Sr. Arsénio Paixão Bano
Presidente da Autoridade da RAEOA – ZEESM TL
Sra. Leonia da Costa Monteiro
Sec.Reg. Adjunta para Reforço Instituçional
Sr. Maximiano Neno
Sec.Reg. Adjunto para Assuntos Sociais
Sra. Abelina da Costa
Sec.Reg. para Educação e Solidariedade Social
Sra. Elisa Maria Maniquin
Sec.Reg. para as Finanças
Sr. António Helmenegildo da Costa
Sec.Reg. para Assuntos de Terras e Propriedade
Sr. Martinho Abani Elu
Sec.Reg. para a Administração
Sr. José Eta
Sec.Reg. para a Agricultura
Sr. Manuel da Costa
Sec.Reg. para a Saúde
Sr. Pedro da Cunha B da Silva
Sec.Reg. para o Comercios e Industrias