S. E Prezidente Autoridade Rejiaun Administrativu Espesiál Oé-cusse Ambenu (RAEOA) no Zona Espesiál Ekonómia Sosiál Merkadu (ZEESM) Timor-Leste Arsénio Paixão Bano, akompaña hosi S.E membru Autoridade no delegasaun hosi Timur Tengah Utara, partisipa mós hosi Diretór Jerál Ministériu Negosiu Estrajeiru no Kooperasaun sai sasin Lansa fatuk dahuluk ba projetu konstrusaun postu integradu Oésilo ne’ebé importante tebes ba RAEOA reprezenta Timor leste atu hametin relasaun ho Indonézia.

Projetu konstrusaun postu integradu Oésilo konstrui iha fronteira Suku Bobometo Sub-rejiaun Oésilo ligadu ho Napan Indonézia importante tebes no RAEOA konsidera hanesan postu integradu perdamain (Paz) atu hametin relasaun entre Timor leste ho Indonézia tanba RAEOA sai espellu Timor leste ba nasaun viziñu indonézia, Prezidente Autoridade RAEOA no ZEESM TL afirma iha lansamentu postu integradu Oésilo.

Ezekutivu RAEOA realsa katak konstrusaun postu integradu Oésilo konstrui fazeadamente hahú ho infraestrutura báziku atu prepara konstrui postu integradu refere hahú ho servisu Alfandega nian. Aleinde konstrusaun postu integradu Oésilo RAEOA mós hahú prepara kondisaun infraestrutura báziku ho projetu konstrusaun estrada nasionál Tono-Oésilo no Noefefa-Oenunu ne’ebé servisu la’o namanas hela, hosi Projetu hirak ne’e bazeia ba planu IX Guvernu konstitusionál prosesa atu adere ba Asean.

Enkuantu konstrusaun postu integradu Oésilo nia objetivu atu fasilita atendimentu servisu iha fronteira hodi menus kiak no hasa’e kresimentu ekonomia, postu integradu ne’e kompostu hosi atendimentu Alfandega, servisu Imigrasaun, Saúde, Banku, Kuarantena, Transporte.

Entretantu Xefe Suku Bobometo Yosep Elu no Jestor Sub-rejiaun Oésilo Domingos Marques husu agradese ba inisiativa Autoridade RAEOA ohin bele lansa fatuk dahuluk ba projetu konstrusaun postu integradu Oésilo ne’ebé tinan barak komunidade sub-rejiaun Oésilo hein hela.

Projetu konstrusaun postu integradu Oésilo ezekuta hosi kompañia Lifau Indah Unip Lda ho valor kontratu $ 510, 516. 73 ho durasaun kontratu fulan 12 (tinan ida).

Partisipa iha lansamentu projetu konstrusaun postu integradu Oésilo, Membru Autoridades, reprezentante MNEK, Delegasaun hosi NTT no TTU, KBRI destakadu RAEOA, Konsuladu Timor leste iha Atambua, F-FDTL destakadu RAEOA, Dirtor rejionais, Xefe Departamentu, Jestor Sub-rejionais, Xefe Suku, no komunidade.