S.E Prezidente Autoridade Rejiaun Administrativa Espesial Oé-cusse Ambeno, (RAEOA) no Zona Espesial Ekonomia Sosial no Merkadu (ZEESM TL) Sr. Arsénio Paixão Bano, hamutuk Prezidente INFORDEPE Sr.Domingos Martins no akompaña hosi S.E. Sekretaria Rejionál Adjunta Prezidente Autoridade Asuntu Reforsu Institusional Sra. Leonia da Costa Monteiro, no Sekretariu Rejionál Adjuntu PA Asuntu Sosias Sr. Maximiano Neno no Membru Autoridade inaugurasaun hosi sentru formasaun profesór iha St. Roza Suku Costa Sub-rejiaun Pante Makassar.

Prezidente Autoridade RAEOA no ZEESM TL afirma katak atu garante kualidade edukasaun ba jerasaun foun presiza kria kondisaun formasaun ba profesór sira.

Ita presiza duni sentru formasaun ida ne’e ba profesór sira tanba ita iha profesór rihun ida resin presiza hetan formasaun ba médiu no longu prazu iha profesór kualifikadu atu bele hanorin oan sira, ohin loron ita iha rihun rua nulu resin lima estudante, ita presiza labarik sira ne’e matenek liu ita, se sira matenek liu ita presiza kria kondisaun ba manorin na’in sira no estudante sira.

Nune’e ohin ita inaugura sentru ne’e parese iha finadu hotu manorin na’in 121 sei uza fatin ne’e signifika RAEOA iha nia sentru rasik ona.

Tuir lolos iha inaugurasaun sentru refere partisipa mós Prezidente da Republika maibé parese iha atividade seluk ohin labele marka prezensa tanba nia mós iha interese ba sentru refere iha momentu nia vizita RAEOA, maibé hosi Prezidente INFORDEPE marka prezensa ne’e agradese.

Entretantu Sekretáriu Rejionál Asuntu Edukasaun no Solidariedade Sosial (SRESS) Abelina da Costa haktuir tan katak ohin hamutuk iha fatin ida ne’e sai sasin ba inaugurasaun sentru formasaun ida importante tebes ba ema hotu ne’ebé hakna’ar an hanesan manorin tenke fó formasaun. Iha sala tolu bele fasilita formasaun ne’ebé rejista ona nivel akadémiku baxarelatu 121 hakna’ar an hanesan manorin na’in atu tuir formasaun hodi hasa’e koñesimentu.

Enkuantu mobiliariu ba sentru formasaun ne’e preparadu ona atu distribui no halo operasaun funsionamentu sentru refere.

Konstrusaun sentru formasaun ne’e ezekuta hosi kompañia Irmão Timor Unip Lda ho valór kontratu $347, 755.81 durasaun kontratu fulan haat kompleta ho estensaun kontratu fulan sia. Orsamentu ba konstrusaun sentru formasaun ne’e prevee hosi OJE 2022 nian.