RAEOA: 02 Agustu 2023
Sua Exelensia Prezidente Autoridade Rejiaun Administrativu Espesial Oe-cusse Ambenu (RAEOA) no Zona Espesial Ekonomia Sosial Merkadu (ZEESM) Timor-Leste Arsénio Paixão Bano, akompaña hosi Sekretáriu Rejionál Asuntu Terras no Propriedades Sr. Antonio H. da Costa no Xefe Departamentu Estrada Ponte Kontrolu e Cheias Sr. Camilo D. J. Quefi, kuarta-feira ne’e vizita projetu reabilitasaun estrada rurál haat ne’ebé liga ba suku Abani – suku Malelat Sub-rejiaun Passabe.
Objetivu hosi vizita ne’e Prezidente Autoridade atu hare direta progresu servisu reabilitasaun haat inklui projetu foun rua foin lansa iha fulan kotuk nia progresu servisu hodi fó korajen nune’e bele aselera servisu hodi kumpre ba kontratu tuir espesifikasaun ne’ebé mensiona iha kontratu.
Ohin mai vizita estrada rurál iha ligasaun suku Abani ba Suku Malelat iha lote rua 3 no lote 2 ne’ebé manán hosi kompañia Am-Lhichoe Unip. Lda hatudu progresu di’ak tebes iha lote atinji 5% no iha lote 3 atinji 10%.
Ha’u kontente tebes tanba foin lansa fulan ida maibé progresu la’o di’ak tebes No projetu konstrusaun estrada rurál hosi Suku Malelat- Abani pakote lote 2 ho lote 3 manán hosi kompañia Am-Lhicchoe Unip Lda, nune’e lote2 naruk 2,200 Km no lote 3 naruk 2,400 kilómetru ho valór kontratu lote2 622, 244. 44 no lote3 valór kontratu 491, 895,57, ho durasaun servisu tinan ida. Autoridade RAEOA prevee orsamentu ba projetu refere hosi Orsamentu jerál Estadu 2023.
Projetu ne’e servisu la’o ho di’ak tanba kompañia iha kooperasaun di’ak ho Autoridade lokál no komunidade hodi kontribui ba dezenvolvimentu. Planu kompañia sei envolve mós komunidade iha suku Malelat no Abani ba servisu iha projetu refere.
Aleinde ida ne’e mós vizita projetu reabilitasaun estrada rurál iha Suku Abani vila liga aldeia Haemnanu ne’ebé manán hosi kompañia Asys Tono Unip Lda ho progresu servisu 18% no estrada rurál husi Cusi Suku Banafi- Malelat ne’ebé manán hosi kompañia CP Unip Lda atinji 50%, ho prezensa ne’e Prezidente Autoridade fó orientasaun ba tékniku sira atu fó xamada atensaun ba kompañia Asys Tono Unip Lda ho CP durante fulan rua atu kumpri kontratu, kuandu progresu servisu nafatin maka Autoridade sei deside hodi termina kontratu no halo levantamentu saida sira halo ona nune’e bele tenderizasaun foun hodi kontinua servisu.
