RAEOA: 01 Agustu 2023
Sua Exelensia Prezidente Autoridade Rejiaun Administrativu Espesial Oe-cusse Ambenu (RAEOA) no Zona Espesial Ekonomia Sosial Merkadu (ZEESM) Timor-Leste Arsénio Paixão Bano, akompaña hosi Sekretáriu Rejionál Asuntu Agrikultura Sr. José Eta, Sekretáriu Rejionál Asuntu Komersiu no Industria Sr. Pedro da Cunha B. da Silva, no Xefe Departamentu Estrada Ponte Kontrolu e Cheias Sr. Camilo D. J. Quefi tersa-feira ne’e vizita projetu konstrusaun ponte Bitopa atinji 91% no Ponte Noetoko atinji 90% inklui projetu konstrusaun estrada Usi-Tasa’e Lelaufe atinji 25%.
Objetivu hosi vizita ne’e Prezidente Autoridade atu hare direta progresu servisu konstrusaun Ponte Bitopa ho Noetoko, no konstrusaun estrada Usi-Tasa’e Lelaufe hodi kontrola nune’e bele garante kualidade. Ponte Bitopa no Ponte Noetoko altura 3 metru.
Enkuantu progresu servisu iha projetu konstrusaun Ponte Bitopa aldeia Buqui suku Usi-Tasa’e sub-rejiaun Oésilo ne’ebé atinji ona porsentu 91%, projetu refere nia medida naruk metru 64 no kompleta ho protesaun moru no gabiaun metru 170.
Projetu ne’e ezekuta hosi kompañia Am-Lhichoe Unip. Lda ho durasaun servisu fulan haat, no valór kontratu $ 406, 945.00 no kompañia rekruta traballadór kuaze 20 pesoás.
Entretantu vizita daruak iha projetu konstrusaun ponte Noetoko no Nefometan 1 no 2 suku Banafi sub-rejiaun Nitibe atinji ona porsentu 90%, projetu refere nia medida naruk metru 160 no kompleta ho moru no gabiaun.
Projetu ne’e ezekuta hosi kompañia Lifau Indah Unip. Lda ho durasaun servisu durante fulan neen no valór kontratu $ 625, 451. 54 no kompañia rekruta traballadór kuaze 40 pesoás.
Projetu konstrusaun estrada rurál husi Pune Suku Usi-tasa’e Sub-rejiaun Oésilo- Suku Lelufe Sub-rejiaun Nitibe atinji ona 25% manán hosi kompañia Lifau Indah ho distánsia 2.500 Km, durasaun kontratu fulan 9. Orsamentu hosi Projetu estrada refere Autoridade RAEOA prevee hosi OJE 2023.
Enkuantu projetu ponte Bitopa ho Noetoko konstrui bazeia ba ponte antigu Bihala ho Oébaha, no nia kualidade di’ak liu ponte antigu rua refere tanba Corgate (goron goron) diagrama espesu bo’ot no todan 120 ton nune’e ponte foun rua ne’e kualidade liu ho nia altura metru 3.
