Sua Exelensia Prezidente Autoridade Rejiaun Administrativu Espesiál Oé-cusse Ambenu (RAEOA) no Zona Espesiál Ekonómia Sosiál Merkadu (ZEESM) Timor-Leste Arsénio Paixão Bano, akompaña hosi Sekretáriu Rejionál Asuntu Terras no Propriedades Sr. Antonio H. da Costa no Xefe Departamentu Estrada Ponte Kontrolu e Cheias Sr. Camilo D. J. Quefi, sesta-feira ne’e vizita projetu reabilitasaun profunda no reforsu infraestrutura ba protesaun kontrolu no cheias Gabiaun Banoko suku Lalisuk no Gabiaun iha suku Naimeko Sub-rejiaun Pante makassar.

Objetivu hosi vizita ne’e Prezidente Autoridade atu hare direta progresu servisu reabilitasaun profunda no reforsa infraestrutura ba protesaun kontrolu no cheias Gabiaun atu enkoraja kompañia sira servisu bazeia tuir espesifikasaun materiál iha BOQ nune’e bele garante kualidade, hodi proteje natar, toos, no uma komunidade inklui infraestrutura sira.

Projetu reabilitasaun profunda no reforsu infraestrutura ba protesaun kontrolu no cheias Gabiaun Banoko suku Lalisuk manán hosi kompañia Jordano 2020 Unip Lda ho valor kontratu 110,553.99 durasaun kontratu fulan sia inklui ho estensaun kontratu. Distánsia gabiaun metru 400, profunda ba gabiaun metru 3. Kompañia foin hahú servisu ba limpeza inklui mobilizasaun materiál maibé diretór kompañia kompromete sei finaliza tuir tempu kontratu.

Enkuantu Projetu reabilitasaun profunda no reforsu infraestrutura ba protesaun kontrolu no cheias Gabiaun Oélole suku Naimeko manán hosi kompañia Lifau Indah Unip Lda ho valór kontratu 312,540.00, progresu servisu atinji ona 20%, durasaun kontratu fulan sia inklui ho estensaun kontratu. Projetu gabiaun Oélole gabiaun distánsia metru 700, no profunda ba gabiaun metru 3.

Kompañia Lifau Indah Unip Lda rekruta traballadór na’in 50 hosi komunidade suku Naimeko kompostu hosi ina feto sira inklui joven sira.

Aleinde ida ne’e Prezidente Autoridade mós vizita projetu konstrusaun estrada nasionál Tono-Oésilo no terminál transporte públiku Tono.