RAEOA: 29 Maiu 2023
Sua Exelensia Prezidente Autoridade Rejiaun Administrativu Espesial Oe-cusse Ambenu (RAEOA) no Zona Espesial Ekonomia Sosial Merkadu (ZEESM) Timor-Leste Arsénio Paixão Bano, segunda-feira ne’e partisipa iha Kompetisaun Negosiu Inovativu (KNI), hosi Ministériu Turizmu Comersiu Industria (MTCI) parseria ho Programa Nasoens Unidas ba Dezenvolvimentu (UNDP) realiza kompetisaun ba negósiu ki’ik iha Otél Oéupu.
Prezidente Autoridade RAEOA-ZEESM TL afirma katak atividade Kompetisaun Negosiu Inovativu ne’e importante tebes ba RAEOA, tanba rai atu muda an ho lais presiza hametin ekonomia família, mak tenke kria negósiu ki’ik no nia merkadu entre ita ho ita maka sosa sasán ba malu. Entaun kompetisaun ida ne’e atu motiva ema hodi bele kria servisu ba an rasik duke simu saláriu hosi ema seluk.
Inisiativa hirak ne’e atu reforsa hodi hamenus importasaun produtu hosi rai seluk. Autoridade RAEOA halo esforsu makas dezenvolve infraestrutura báziku hanesan estrada urbana, no estrada rurál sira hodi ajuda movimentu komunidade ba sirkulasaun ekonomia, hakotu nia.
Foin sa’e sira ne’ebé mai ho ideia úniku kreativu no inovativu sai empregadór hamutuk na’in 57 ne’ebé liu iha verifikasaun hodi bele tuir pre-kaulifikasaun kompetisaun Negosiu Inovativu (KNI). Enkuantu rezultadu kualifikasaun iha empregadór na’in 12 sai kualifikasaun di’ak hodi halo aprezentasaun ba planu negósiu ki’ik iha kompetisaun Negosiu Inovativu, ne’e kompostu hosi setór Agrikultura, Komersiu, Industria, no Turizmu. Rezultadu hosi aprezentasaun empregadór na’in 12 iha kompetisaun refere maka empregadór na’in 6 sai vensedór no hetan prémiu ho valór osan $500.00-3.000.00.
kompetisaun ne’e oferese ba foin-sa’e sira ne’ebé mai ho ideia úniku, kreativu no inovativu ho objetivu atu promove fó apoiu kapasitasaun no ekipamentus ba Foin-Sa’e sira ho intensaun atu motiva no inspira sira investe iha setór produtivu hanesan Agrikultura, Peskas, Komérsiu, Indústria, Turismu, Teknolojia no Inovasaun Ai-han ne’ebé orienta ba impaktu sosiál no fó valór aas ba ekonomia rai laran hodi kontribui rezolve problema sosiál komunidade nian.
