Sua Excelência Prezidente Autoridade Rejiaun Administrativa Espesial Oé-cusse Ambeno (RAEOA) no Zona Espesiál Ekonómia Sosiál Merkadu (ZEESM TL) Sr. Arsénio Paixão Bano, akompaña hosi membru Autoridade tersa-feira ne’e lansa fatuk dahuluk ba projetu estrada Nasionál ho distánsia kilómetru 18 hosi sub-rejiaun Pante makassar ba sub-rejiaun Oésilo, lansamentu refere realiza iha aldeia Oébaha Suku Bobometo Sub-rejiaun Pante makassar.

Prezidente Autoridade RAEOA no ZEESM TL Arsénio Paixão Bano afirma katak agradese ba Primeiru Ministru Eis Jenerál Taur Matan Ruak ohin nia la marka prezensa maibé nia felisita no fó parabéns ba RAEOA tanba halo avansu pozitivu ida tan lansa estrada nasionál hosi Tono sub-rejiaun Pante makassar ba Sub-rejiaun Oésilo.

La haluha mós agradese ba Guvernu Sentrál no Parlamentares sira ne’ebé maka aprova orsamentu ba projetu ida ne’e. projetu ne’e importante ba RAEOA dezde Prezidente Autoridade anteriór Dr. Mari Alkatiri bainhira hahú lidera RAEOA ho ZEESM TL estrada nasionál Oésilo tama tiha ona pakote ida importante tebes, estudus halo tinan barak ona hosi Diresaun Rejionál Infraestrutura lidera hosi Diretór Candido dos Reis Amaral, no Unidade Akompañamentu Koordenador Rui Pinto, hamutuk ho tékniku sira seluk esforsu makas finaliza estudu ne’e no ohin bele hahú lansa estrada refere.

Estrada ida ne’e sei fó benefísiu boot ba RAEOA la’os de’it atu mellora asesu Pante makassar- Oésilo maibé sei mós emprega traballadór ema barak ba estrada refere, no kompañia sub- kontratór barak sei hetan servisu barak hosi estrada ne’e rasik.

Ezekutivu ne’e esklarese katak estrada ida ne’e mós sei hasoru problema oioin kanaba Rai nian, ita sei diskute barak kona-ba asuntu rai la’os de’it lansamentu hatuur fatuk dahuluk de’it maibé sei diskute kona-ba autorizasaun rai, hosi Oésilo, Oebaha, Naimeko no Bobokase atu ko’alia oinsá? tanba estrada ne’e hanesan estrada nasionál ne’ebé nia luan 30 metru hanesan mós estrada nasionál pakote A Noefefa Oénunu, entaun komunidade sira labele ta’uk ba asuntu ida ne’e maibé presiza hahú tanba rai sei halo kompensasaun, ai produtivu sei selu uma sei troka ho uma. Ha’u husu de’it komunidade nia kooperasaun no kolaborasaun atu nune’e kompañia bele hahú servisu tuir kontratu ne’ebé estabelese ona.

Aleinde projetu ida ne’e iha mós estrada rurál balun hahú prosesa avaliasaun dokumentu ba tenderizasaun estrada rurál hosi Oébaha-Bitopa, hosi Nunuhenu ba Nitibe, Passabe -Tumin, avansa barak autoridade halo iha tinan ida ne’e.

Entretantu projetu Estarda Nasionál Pante makassar- Oésilo ezekuta hosi empreza internasionál PT Waskita Karya ho valór kontratu $33,915,000.00 $33 resin hosi orsamentu ne’e autoridade prevee hosi Orsamentu Jerál estadu 2023 ho durasaun servisu tinan rua.