RAEOA: 20 Jullu 2023
Sua Exelênsia Prezidente Autoridade Rejiaun Administrativu Espesiál Oé-cusse Ambenu (RAEOA) no Zona Espesiál Ekonómia Sosiál Merkadu (ZEESM) Timor-Leste Arsénio Paixão Bano, akompaña hosi Sekretáriu Rejionál Adjuntu PA Asuntu Sosiais, Sr. Maximiano Neno no no Membru Autoridade kinta-feira ne’e lansa reabilitasaun estrada rejionál hosi Nunuhenu suku Cunha ba Suku Taiboko .
Prezidente Autoridade RAEOA no ZEESM TL hatete iha lansamentu reabilitasaun konstrusaun estrada rejionál hosi Nunuhenu suku Cunha ba Taiboko pakote A karik iha posibilidade planeamentu agora tau ba planu PAA 2024 atu aumenta sa’e ba Nitibe to’o Usitaco no ba Suku Lelaufe simu ho estrada hosi Pune mai Lelaufe, neineik ita sei la’o to’o iha ne’ebá. Lansamentu ohin ne’e hahú ho reabilitasaun protesaun moru no halo drainage ha’u fiar katak Oé-cusse atu iha mudansa tinan rua tolu tan ita tama ona ba fui alkatraun, inísiu ita hahú ho reabilitasaun.
Tinan ida ne’e Autoridade RAEOA konstrui estrada rurál iha sub-rejiaun Passabe- Malelat, Usi-Tasa’e -Lelaufe, Oébaha-Bitopa, projetu nasionál Tono-Oésilo, inklui projetu ohin halo lansamentu.
Ezekutiva ne’e husu komunidade no ema atu kontribui ba dezenvolvimentu no koopera ho kompañia Lifau Indah Unip.Lda hodi halo servisu atu kumpre tuir kontratu.
Entretantu Diretor Diresaun Rejional Infraestrutura Candido Dos Reis Amaral informa katak lansamentu reabilitasaun estrada rejionál Nunuhenu suku Cunha-Suku Taiboko pakote A ba to’o kedas fronteira Suku Lelaufe. Importánsia hosi lansamentu projetu ne’e ita hotu sai sasin ba kompañia Lifau Indah Unip Lda, no fó hanoin kompañia atu oferese servisu ho kualidade no husu mós kompañia atu respeita regras safety nian no kumpre ba kontratu.
Projetu reabilitasaun estrada ezekuta hosi Kompañia Lifau Indah Unip Lda ho valór kontratu 738.204,15 ho distánsia 7 Km durasaun kontratu fulan 9. Orsamentu Autoridade RAEOA prevee hosi Orsamentu Jeral Estadu 2023 nian.
Estrada ne’e sei fó benefísiu ba populasaun iha sub-rejiaun Pante makassar no Nitibe hodi halo movimentu asesu ba merkadu.
