RAEOA; 11 Agustu 2023
Autoridade Rejiaun Administrativa Espesial Oé-cusse Ambeno, (RAEOA) no Zona Espesial Ekonomia Sosial no Merkadu (ZEESM TL) lideradu Sua excelêcia Arsénio Paixão Bano akompaña hosi Sekretáriu Rejionál Adjuntu PA Asuntu Sosiais Sr. Maximiano Neno akompaña husi Membru Autoridade iha sesta-feira ne’e marka istoria foun iha aldeia Bebo suku Lelaufe Sub-rejiaun Nitibe hetan eskola foun hodi fasilita oan sira asesu pre-eskolár iha areas remotas.
Inaugurasaun eskola pre-eskolár ne’e importante tebes tanba Autoridade RAEOA liuhosi Sekretária Rejionál Asuntu Edukasaun Solidariedade Sosial tau prioridade makas ba setór edukasaun iha área remotas no urbana labarik ki’ik oan sira asesu edukasaun besik liu ba povu.
Ezekutivu ne’e salienta tan katak planu iha tinan ida ne’e konstrui sei konstrui eskola 23 inklui EPE 7. Eskola ne’ebé sei konstrui foun kompostu EBF filial, EBC, inklui Eskola sekundária Jeral no iha aldeia Bebo sei hetan eskola sekundária jerál ida no prosesu iha ona aprovizionamentu. Esforsu hirak ne’e hotu atu responde ba traballu infantíl hosi RAEOA.
Nune’e husu ba inan aman no profesór sira atu kooperasaun entrega rai hodi dezenvolve eskola ne’e no ohin hamutuk sai sasin asina termu entrega. Entaun agradese ba kompañia CANARE Unip Lda nia esforsu tomak mezmu situasaun difisil maibé ho nia kapasidade jestaun bele finaliza obra ne’e ho kualidade tuir kontratu ne’ebé atribui.
Entretantu Sekretária Rejionál Asuntu Eduksaun no Solidariedade Sosial Abelina da Costa aproveita oportunidade husu ba komunidade no profesór sira atu tau atensaun, kontrola no kuida edifísiu refere hodi bele oan sira eskola ho di’ak. Nia hatutan katak iha fulan setembru bele hahú ona rejista alunu foun ba eskola pre-eskolár hodi bele uza ona edifísiu foun tanba ohin ita mai inaugura no mós lori kedas fasilidades ba eskola ne’e maka kadeira, meza, kuadru avizu atu entrega.
Projetu konstrusaun eskola Pre-eskolar ne’e manán hosi kompañia CANARE Unip Lda ho valór kontratu $75.135.30 durasaun kontratu fulan haat inklui estensaun kontratu tinan ida. Orsamentu ba eskola refere Autoridade RAEOA liuhosi SRESS prevee orsamentu hosi 2022.
Enkuantu iha tempu badak SRESS sei halo inaugurasaun ba eskola Ulas Lama, EPE Palsam suku Malelat, no Faot Kenfua
