RAEOA; 22 Setembru 2023
S.E Prezidente Autoridade Rejiaun Administrativa Espesial Oé-cusse Ambeno, (RAEOA) no Zona Espesial Ekonomia Sosial no Merkadu (ZEESM TL) Sr. Arsénio Paixão Bano, akompaña hosi S.E. Sekretariu Rejional Adjuntu Prezidente Autoridade Asuntu Sosiais Sr. Maximiano Neno no Membru Autoridade inaugura Ponte Noetoko ne’ebé sei fasilita komunidade iha Sub-rejiaun Nitibe, Oésilo, Passabe no Pante Makassar.
Ohin inaugura Ponte Noetoko ne’ebé lokaliza iha Suku Banafi importantes atu fasilita komunidade iha sub-rejiaun haat hanesan Oésilo, Nitibe, Passabe inklui aldeia Maunaben Suku Cunha Sub-rejiaun pante makassar.
Autoridade mós enkoraja komunidade iha suku Usi-tasa’e no Banafi atu labele estraga ai ne’ebé moris besik ponte ne’e, tanba ponte la’ós liga Suku Lelaufe ho Banafi nia mós fó asesu komunidade aldeia Maunaben suku Cunha, entaun ponte refere sei benefísiu ba movimentu komunidade iha Sub-rejiaun haat.
Entretantu Diretor Rejionál Infraestrutura Candido dos Reis Amaral relata katak projetu konstrusaun ponte Noetoko, Neofmetan 1 no 2 ohin hamutuk sai sasin halo inaugurasaun, manán ba projetu hosi kompañia Lifau Indah Unip Lda ho valór kontratu $625,451.554 durasaun kontratu fulan haat. Ponte Noetoko nia distánsia 84 metru kompleta ho protesaun gabiaun metru 170, ponte Neofmetan 1 distánsia 1, 7 metru no Neometan 2 distánsia 8 metru.
Iha sorin seluk Gestor Sub-rejiaun Nitibe hato’o agradese ba Autoridade RAEOA no ZEESM TL ne’ebé konstrui ona Ponte Noetoko inklui ponte Neofmetan 1 no 2 tanba dezde tempu Portugés komunidade iha Sub-rejiaun Nitibe difikulta tebes asesu ponte no estrada iha tempu udan hodi lori produtu lokál asesu ba merkadu.
Partisipa iha Inagurasaun ne’e maka Membru Autoridade, Diretores Rejionais, Xefe Departamentu, Xefe Gabinete, Jestor Nitibe, OPS Suku Banafi, Xefe Suku ,Lia Nain no komunidades.
