RAEOA; 22 Setembru 2023
S.E Prezidente Autoridade Rejiaun Administrativa Espesial Oé-cusse Ambeno, (RAEOA) no Zona Espesial Ekonomia Sosial no Merkadu (ZEESM TL) Sr. Arsénio Paixão Bano, akompaña hosi S.E. Sekretariu Rejional Adjuntu Prezidente Autoridade Asuntu Sosiais Sr. Maximiano Neno no Membru Autoridade iha sesta-feira ne’e inaugura eskola filial báziku haat atu fasilita asesu edukasaun iha sub-rejiaun Pante Makassar, Nitibe, no Passabe.
Ohin inaugura Eskola Filial Baziku haat konsentra iha Ulas Lama sai sasin halo inaugurasaun tanba labarik iha Ulas Lama Suku Taiboko sub-rejiaun Pante Makassar ne’ebé durante ne’e asesu eskola tenke la’o distánsia dook to’o iha Kiusisok, no inaugura mós eskola filial Faotkenfua suku Usitaco Sub-rejiaun Nitibe, eskola filial báziku Palsam Suku Malelat, no eskola filial báziku Aijaofuk suku Abani Sub-rejiaun Passabe.
Nia mós agradese ba komunidade sira nia kolaborasaun entrega rai ba estadu atu halo dezenvolvimentu iha suku no aldeia hodi ajuda oan sira asesu eskola ne’ebé besik. Agradese mós ba kompañia sira nia kontribuisaun no esforsu finaliza no ohin hamutuk sai sasin halo inaugurasaun.
Entretantu Xefe Suku Taiboko hato’o sentimentu agradesimentu ba Autoridade RAEOA no ZEESM TL ne’ebé hola inisiativa di’ak konstrui eskola iha Ulas Lama ne’ebé durante tinan barak nia laran sira tenke hakat mota atu asesu eskola iha Kiusisok ho eskola ida ne’e bele fasilita ona sira asesu eskola besik iha hela fatin.
Projetu konstrusaun eskola filial báziku Ulas Lama manán hosi kompañia Hunubahalaco Unip Lda, ho valór kontratu $58, 760.11 ho durasaun kontratu fulan haat, eskola báziku filial Faotkenfua manán hosi kompañia Colomeob Unip Lda ho valór kontratu $81, 528.94 durasaun fulan haat, eskola filial báziku Palsam manán hosi kompañia Loro Ti’as ho valór kontratu $117, 671.08 no eskola filial báziku Aijaofuk manán hosi kompañia Sufnentimo Nafael Unip Lda ho valór orsamentu $26,666.66 ho durasaun kontratu fulan haat.
Partisipa iha Inagurasaun ne’e maka Membru Autoridade, Diretores Rejionais, Xefe Departamentu, Xefe Gabinete, OPS, Xefe Suku ,Lia Nain no komunidades.
