S.E Prezidente Autoridade Rejiaun Administrativa Espesial Oé-cusse Ambeno, (RAEOA) no Zona Espesial Ekonomia Sosial no Merkadu (ZEESM TL) Sr. Arsénio Paixão Bano, akompaña hosi Sekretáriu Rejionál Asuntu Terras no Propriedades Sr. Antonio H. da Costa no tékniku sira halo fiskaliza ba projetu konstrusaun uma afetadu 36 faze primeiru iha suku Lifau no suku Taiboko. Projetu konstrusaun uma afetadu faze primeiru 36 ne’ebé hetan efeitu hosi projetu Estrada nasionál Noefefa-Oénunu no autoridade REAOA halo esforsu rezolve uma troka uma, plantasaun kompensa ho osan, no rai sei kompensa ho osan.

Estrada ne’e parese primeira estrada iha Oé-cusse halo kompensasaun ba plantasaun, uma ne’ebé hetan efeitu hosi estrada primeiru faze hahú ho 36 abitasaun sosiál no sei prosesu tan faze segundu uma abitasaun sosiál 83, no rai ninian primeira vez iha Timor leste tanba tuir prosesu legál tomak halo publikasaun rai afetadu sira, fulan kotuk hahú halo publikasaun mapa rai durante loron 90 laiha reklamasaun autoridade sei hahú halo kompensasaun ba rai ninian bazeia ba rezolusaun governu sentrál aplika iha Suai ninian no emita mós títulu ba rai sira ne’e.

Entretantu uma abitasaun sosiál faze primeiru hamutuk uma 36 iha modelu tipu tolu A 10 X 13, tipu B 9 X 12 no tipu C 7 X 6

Uma abitasaun sosiál tipu A ezekuta hosi kompañia Rumbia Luliheni Unip Lda ho valór kontratu $102,281. 92 no durasaun kontratu fulan haat atinji ona 0,30%. Tipu C ezekuta hosi kompañia Nunmabun Unip Lda ho valór kontartu $ 369, 681.96 ho durasaun fulan haat atinji ona 0,91% No tipu C seluk ezekuta hosi kompañia Sikoneroc Unip Lda ho valór kontratu $ 228, 928.99 ho durasaun fulan haat no atinji ona 0,40%. Enkuantu tipu B sei iha hela faze tenderizasaun iha aprovizionamentu.