Sua Exelensia Prezidente Autoridade Rejiaun Administrativu Espesial Oe-cusse Ambenu (RAEOA) no Zona Espesial Ekonomia Sosial Merkadu (ZEESM) Timor-Leste Arsénio Paixão Bano, akompaña hosi Sekretáriu Rejionál Asuntu Agrikultura Sr. Jose Eta no Sekretáriu Rejionál Asuntu Saúde Sr. Manuel da Costa kuarta-feira ne’e simu audiénsia hosi Komendante Polisia interinu RAEOA Superintendente Xefe Ludgerio Lay iha Sala enkontru Gabinete Prezidente Autoridade Oébau.

Objetivu hosi Audiénsia maka Komando Polisia RAEOA atu aprezenta an no kumprimenta ba Prezidente Autoridade katak durante fulan hirak nia laran sei asumi knaar hanesan komandante Interinu PNTL RAEOA hodi hein nomeasaun komandante foun hosi Komando Jeral PNTL Timor Leste.

Komandante Interinu ne’e mós kompromete durante mandatu sei koopera ho Autoridade no entidades hotu hala’o knaar tuir lei no orden atu kontinua asegura nafatin seguransa iha RAEOA.

Entretantu Prezidente Autoridade RAEOA no ZEESM TL iha biban ne’e hato’o lia vemvindu no parabeniza ba Komendante Interinu PNTL RAEOA, agradese tebes ba disponibilidade bele mai aprezenta an iha Autoridade RAEOA hodi hametin kooperasaun iha kualkér atividades Autoridade REAOA prontu apoiu.

Ezekutiva ne’e mós kompromete ba Komendante interinu PNTL RAEOA hodi fó Dekretu lei nú 3/2014 kona-ba kompeténsia RAEOA nian.