Sua Exelênsia Prezidente Autoridade Rejiaun Administrativu Espesiál Oé-Cusse Ambenu (RAEOA) no Zona Espesiál Ekonómia Sosiál Merkadu (ZEESM) Timor-Leste Sr. Arsénio Paixão Bano, akompaña hosi Sekretáriu Rejionál Asuntu Agrikultura Sr. José Eta, ho Diretor Rejionál Agrikultura Sr. Sirilio dos Remendios Baba, hala’o enkontru kortezia ho Excia Sekretáriu Estado Floresta Sr. Fernandino Veira da Costa, ho komitiva iha Gabinete Prezidente Autoridade Oébau.

Iha sorumutu ne’e Sekretáriu Estadu Floresta kumprimenta ba Prezidente Autoridade kona-ba atividade vizita durante iha RAEOA. Objetivu vizita Sekretariu Estadu Floresta iha RAEOA atu partisipa iha enseramentu programa Oé-cusse Perma Youth Camp 2023 iha Lakufoan, aproveita oportunidade introdús planu prioridade 14 iha floresta nian, vizita sentru viveirus komunitáriu sira iha RAEOA, vizita mós área protezida definitivu neen iha RAEOA, no atu hare mós kontrolu ai-kameli iha área fronteira nian hodi kuda fali ai-kameli.

Iha biban ne’e Prezidente Autoridade hato’o agradese no lia venvindu Excia Sekretariu Estadu Floresta vizita iha RAEOA ba daruak husi IX Guvernu Konstitusional nian, Autoridade RAEOA prontu koopera ho Guvernu sentrál atu ezekuta.

Iha biban ne’e Prezidente Autoridade introdús kona-ba progresu servisu iha RAEOA kona-ba Floresta nian maka Autoridade AREOA liuhosi Sekretariu rejionál Asuntu Agrikultura iha tinan kotuk konsege konstrui sentru viveirus komunitáriu haat iha sub-rejiaun haat, no konstrui mós Embung lima iha suku sira no daudaun kontinua konstrui tan Embung balun, no halo kontrollu ba área protezida neen definitivu iha RAEOA hamutuk 30 míl hektar.