RAEOA; 24 Agostu 2023
Sua Exelênsia Prezidente Autoridade Rejiaun Administrativu Espesiál Oé-Cusse Ambenu (RAEOA) no Zona Espesiál Ekonómia Sosiál Merkadu (ZEESM) Timor-Leste Sr. Arsénio Paixão Bano, akompaña hosi Sekretáriu Rejionál Adjuntu PA Asuntu Sr. Maximiano Neno, Sekretáriu Rejionál Asuntu Administrasaun Sr. Martinho Abani Elu, hala’o enkontru kortezia hosi Vice Ministru Administrasaun Estatal Sr. Jacinto Rigoberto ho komitiva iha Gabinete Prezidente Autoridade Oébau.
Iha sorumutu ne’e Vice Ministru Administrasaun Estatal kumprimenta ba Prezidente Autoridade kona-ba objetivu vizita iha RAEOA durante loron ida. Objetivu vizita Vice MAE iha RAEOA atu introdús planu prioridade MAE nian iha nia mandatu IX Guvernu konstitusionál maka verifika progresu no difikuldades implementasaun programa dezenvolvimentu rurál (PNDS) nian, preparasaun administrasaun eleitorál (eleisaun suku ne’ebé sei realiza iha fulan Outubru tinan ne’e) no preparasaun implementasaun programa desentralizasaun.
Iha vizita ne’e mós sei halo vizita projetu PNDS nian kona-ba Uma Naroman ba Povu, Estrada rurál, perturbasaun bee mós no halo inaugurasaun ba Uma Naroman ba Povu sia 9 iha RAEOA.
Iha biban ne’e Prezidente Autoridade hato’o lia venvindu Excia Vice MAE iha RAEOA husi IX Guvernu Konstitusional, Autoridade RAEOA prontu koopera ho Guvernu sentrál atu ezekuta. Iha biban ne’e Prezidente Autoridade introdús kona-ba progresu servisu iha RAEOA no difikuldade balun iha RAEOA. Alinde ida ne’e Prezidente Autoridade aproveita oportunidade rekomenda ba Vice MAE atu kontinua programa dezenvolvimentu rurál tanba fó benefísiu direita ba komunidade, no sorin seluk mós rekomenda ba prosesu liberalizasaun suku preparativus iha RAEOA.
