RAEOA; 16 Novembru 2023
Autoridade Rejiaun Administrativu Espesial Oe-cusse Ambenu (RAEOA) no Zona Espesial Ekonomia Sosial Merkadu (ZEESM) Timor-Leste reprezenta hosi S.E Sekretáriu Rejionál Asuntu Edukasaun no Solidariedade Sosial Sra. Abelina da Costa, akompaña hosi Xefe Departamentu Edifikasaun Sra. Iria Tamele lansa fatuk dahuluk ba projetu konstrusaun eskola lima iha Neten Bitimo suku Lelaufe Sub-rejiaun Nitibe.
Sekretária Rejional Asuntu Edukasaun no Solidariedade Sosial Abelina da Costa, hatete sorumutu ohin eskola atu lansa edifísiu eskola lima iha Sub-rejiaun Nitibe ho Sub-rejiaun Pante Makassar ne’ebé konsentra iha Neten Bitimo.
Ohin lansa fatuk dahuluk ba eskola EBC Neten Bitimo, ne’ebé iha tinan kotuk edukasaun rejionál muda EBF Neten Bitimo sai EBC hodi fasilita estudante finalista EBF sira atu kontinua ba EBC no ohin lansa edifísiu EBC iha Neten Bitimo. Lansa Eskola Sekundaria Geral Haobeno Lela Ufe iha aldeia ne’ebé durante ne’e uza eskola EBC Haobeno nian. Aleinde ida ne’e lansa mós eskola EPE Oelcaem no eskola EPE Hauboni Suku Taiboco tanba governu nia planu fokus ba eskola pre-eskolár. Hosi eskola haat refere iha mós manutensaun eskola Fatbena Taenao Suku Usitaco nian.
Ezekutiva edukasaun rejionál ne’e mós enkoraja komunidade sira atu kontrola no koopera ho kompañia sira hodi aselera servisu tuir kontratu nune’e estudante sira bele asesu eskola ne’ebé besik hela fatin hodi garante kualidade edukasaun iha futuru.
Entretantu eskola EBC Neten Bitimo manán hosi kompañia Fitun Naubabas Unip Lda, durasaun kontratu fulan haat no valór kontratu $. 98,028,73, medida 32.9m x 9m, Eskola EPE Oelcaem manán hosi kompañia Bitimo Unip Lda ho durasaun kontratu fulan haat, ho valór kontratu kuaze $ 96,231.11. medida 23×9.
Eskola Sekundaria Geral Lela Ufe manán hosi kompañia ELHZI Unip Lda ho durasaun kontratu fulan haat no valór kontratu $ 116, 482.38, medida 32×9.
Ensinu Baziku Filial Hauboni manán hosi kompañia Ansagal Unip Lda, durasaun kontratu fulan haat ho valór kontratu $98,531.54, medida 32×9 inklui manutensaun Ensinu Baziku Filial Fatubena Taenao manán hosi kompañia Lexander Unip Lda ho durasaun kontratu fulan haat no valór kontratu $81, 113.27 medida ba eskola refere 46×9.
Autoridade RAEOA tinan ida ne’e konstrui eskola foun hamutuk 19 kompostu hosi EPE, EBF, ESG iha territóriu RAEOA.
Partisipa iha serimónia lansamentu refere maka Diretores rejionais, Xefe Departamentu, lia na’in no komunidade iha fatin refere.
Média GPA
José Mala
