Sua Exelênsia Prezidente Autoridade Rejiaun Administrativu Espesiál Oé-Cusse Ambenu (RAEOA) no Zona Espesiál Ekonómia Sosiál Merkadu (ZEESM) Timor-Leste Sr. Arsénio Paixão Bano, akompaña hosi Sekretária Rejionál Adjunta PA Asuntu Reforsu Institusionál Sra. Leonia da Costa Monteiro, Sekretáriu Rejionál Adjuntu PA Asuntu Sosiais Sr. Maximiano Neno, no Membru Autoridade segunda-feira ne’e selebra lansamentu fatuk dahuluk konstrusaun foun abitasaun sosiál ba afetadu 36 iha suku Lifau, Taiboko, no Suni Ufe.

Governu liuhosi Autoridade RAEOA kumpre promesa uma troka uma, rai troka rai ka halo kompensasaun inklui ai produtivu sira, kompensasaun ba rai Autoridade RAEOA liuhosi Sekretariu Rejional Asuntu Terras no Propriedades hahú halo publikasaun mapeamentu rai iha zona sentrál hosi Sakato Suku Nipani to’o Tono Suku Cunha. Kuandu finaliza sei kontinua halo publikasaun mapeamentu rai ba iha Suku Lifau to’o iha Suku Suniufe Sub-rejiaun Nitibe ne’ebé hetan efeitu hosi projetu estrada Noefefa-Oénunu hodi bele hetan kompensasaun rai nian, hatete Prezidente Autoridade RAEOA-ZEESM TL Arsénio Paixão Bano, iha aldeia tula ika suku Lifau Sub-rejiaun Pante-makassar.

Ohin ne’e ita lansa fatuk dahuluk ba uma troka uma faze primeiru hamutuk 36 ho modelu tipu tolu A, B no C, iha modelu tipu A uma boot ho medida 13×10, tipu B medida 9 x 12 no tipu C 7×6 ne’e uma talin troka ho uma dignu.

Prezidente Autoridade husu Xefe Suku, OPS suku sira, kompañia atu koopera ho komunidade hodi bele aselera servisu ne’e la’o lais, tanba uma troka uma hamutuk 120 ohin foin maka lansa uma foun 36 ba iha faze primeiru, faze segundu sei iha uma 18 sei halo publikasaun rezultadu iha tempu badak. No kompañia sira tenke finaliza molok fulan dezembru tanba tinan foun ha’u hakarak tenke hare uma foun iha estrada nasionál Noefefa-Oenunu.

Projetu abitasaun sosiál hamutuk 36 kompostu hosi tipu A, B, C ne’e manán hosi kompañia tolu, iha lote 1 tipu A manán hosi kompañia Rumbia Luliheni Unip.Lda ho valór orsamentu $ 102, 281.92 ho durasaun kontratu fulan haat.

Iha lote 3 ho tipu C manán hosi kompañia Nunmabun Unip Lda, ho valór orsamentu $ 369.681.96 ho durasaun kontratu fulan haat. No lote 4 tipu C seluk manán hosi kompañia Sikoneroc Unip Lda ho valór orsamentu $228.928.99 ho durasaun kontratu fulan haat. Enkuantu lote 2 tipu B maka sei iha prosesu aprovizionamentu.