Autoridade Rejiaun Administrativu Espesiál Oé-Cusse Ambenu (RAEOA) no Zona Espesiál Ekonómia Sosiál Merkadu (ZEESM) Timor-Leste reprezenta hosi S.E. Sekretária Rejionál Adjunta PA Asuntu Reforsu Institusional Sra. Leonia da Costa Monteiro, no S.E. Sekretáriu Rejionál Adjuntu PA Asuntu Sosiais Sr. Maximiano Neno akompaña hosi Membru Autoridade hala’o reuniaun ho Parlamentu Nasional Komisaun C trata asuntu Finansas Publika iha Gabineti Prezidente Autoridade Oébau.

Sekretaria Rejionál Adjunta PA Asuntu Reforsu Institusional Sra. Leonia da Costa Monteiro relata kona-ba enkontru entre Autoridade RAEOA ho Komisaun C Parlamentu Nasional trata asuntu finansas publika sente orgullu ba vizita ida ne’e tanba la’os komisaun C de’it mai vizita Oé-cusse maibé iha komisaun A no B membru Parlamentu Nasionál mai vizita ona Oé-cuse no fó ona informasaun lubuk ida.

Liuliu iha ohin komisaun C ami relata de’it kona-ba ezekusaun orsamentu jerál estadu ne’ebé maka RAEOA iha 2023 Parlamentu Nasional aprova 120.000.00 fahe ba kategoria rua RAEOA $84 míl no FED 36 míl ho nia ezekusaun to’o 31 Agostu molok debate orsamentu ratifikativu atinji 32 % depois ratifikativu atinji ona 43%.

Ezekutiva ne’e argumenta katak hanesan Autoridade presiza implementa de’it programa no planu sira ne’ebé iha entaun hosi membru deputadu sira hakarak konfirma rezultadu orsamentu jerál estadu tau iha RAEOA rezultadu iha duni ka lae. Ho nune’e ohin Autoridade RAEOA halo aprezentasaun ba komisaun C no iha rezultadu lubuk ida maka ita iha maibé publikamente balun la akompaña katak rezultadu iha Oé-cuse seidauk atinji.

Orsamentu aloka mai iha RAEOA la’ós mai hosi sentrál orsamentu ne’ebé maka maka uluk saldu tranzitadu hela iha RAEOA maka re aloka ba ba orsamentu asaun anuál nian.

Entretantu Prezidente Komisaun C Sra. Cedelizia Faria dos Santos relata katak agradese ba membru autoridade sira nia kooperasaun di’ak tebes fahe informasaun nune’e komisaun C bele relata fali iha plenária Parlamentu Nasional. Enseramentu membru deputadu sira koloka perguntas kuaze Adjunta no Adjuntu ho membru Autoridade konsege iha esplikasaun ne’ebé maka di’ak tebes.

Distinta Deputada ne’e mós salienta katak enkontru ne’e atu hatene progresu ezekusaun RAEOA nian tanba orsamentu RAEOA aprova montante boot no presiza mós hare nia rezultadu atendimentu iha ne’e ita la nega, no hare mós ezekusaun RAEOA nian ne’ebé atinji 32% iha loron ikus 31 agostu debate orsamentu ratifikativu ne’e konsidera ki’ik tebes, maibé iha posibilidade bele aumenta ezekusaun.

Ailiende ida ne’e komisaun C sei halo fiskalizasaun ba projetu sira ne’ebé la’o hela iha RAEOA .

Partisipa iha reuniaun ne’e membru komisaun C, Membru Autoridade, Diretor rejionais, Xefe Departamentu inklui Xefe Gabinete.