S.E Prezidente Autoridade Rejiaun Administrativa Espesial Oé-cusse Ambeno, (RAEOA) no Zona Espesial Ekonomia Sosial no Merkadu (ZEESM TL) Sr. Arsénio Paixão Bano, akompaña hosi S.E Sekretária Rejioonál Asuntu Edukasaun no Solidariedade Sosial Sra. Abelina da Costa no S.E. Sekretáriu Rejional Asuntu Agrikultura, Sr. Jose Eta, ho tékniku sira iha tersa-feira halo fiskalizasaun ba projetu konstrusaun Sentru Formasaun Profesór iha Aldeia Santa Roza suku Costa Sub-rejiaun Pante makassar atinji ona 84%.

Iha vizita ne’e hosi kompañia promete fulan ne’e sei finaliza projetu konstrusaun sentru formasaun profesór tanba departamentu formasaun prosesu hela profesór na’in 121 atu tama formasaun faze II nian ne’ebé primeiru faze kapasita ona profesór na’in 182 ho nivel bacharelato no fasilita formadór hosi UNTL servisu hamutuk Ministeriu Edukasaun liuhosi INFORDEPE, fasilita formasaun profesór na’in 182 iha faze primeiru.

Jerente másimu RAEOA relata katak bainhira sentru formasaun finaliza rai ne’e diferente uitoan maka iha RAEOA maka halo sentru formasaun ba profesór, sira rasik. RAEOA iha departamentu formasaun ba profesór sira nia ita hein katak ho organika foun ita bele hasa’e ba diresaun rejionál ba formasaun profesór sira.

Tanba ita halo prioritiza maka ba área edukasaun halo eskola kada tinan, tau mós fasilidade mobiliariu ba eskola sira kuaze rezolve problema barak inklui pagamentu retroativu sira no agora tama hadi’a tan kualidade edukasaun ho no aumenta fasilidade formasaun ba profesór sira.

Prezidente Autoridade husu kompañia se bele finaliza ho lais di’ak liu tan nune’e bele aselera prosesu formasaun profesór sira ho di’ak liután, tanba sentru ne’e la’os fasilita de’it formasaun pedagojia maibé iha mós ICT ba teknolojia profesór sira.

Projetu konstrusaun Sentru formasaun ezekuta hosi kompañia Irmão Timor Unip Lda ho durasaun kontratu fulan haat, ho valór kontratu $ 347.755,81 no progresu servisu atinji 84% no kompañia garante iha fulan ida ne’e sei finaliza projetu ida ne’e.