S.E. Sekretária Rejional Adjunta Reforsu Intituisional Sra. Leonia da Costa Monteiro ho S.E. Sekretáriu Rejional Asuntu Terras no Propriedades Sr. António Hermenegildo da Costa, akompaña, lidera hosi Prezidenti komisaun C, Sra. Cedelizia Faria dos Santos ho membru Paralamento Nacional komisaun C ne’ebé trata asuntu finansas Publika hala’o fiskalizasaun ba konstrusaun uma troka uma, iha bairo Samoro, Aldeia Sanane, Suku Costa, Sub-rejiaun Pante-makasar.

Uma hirak ne’e konstrui iha tinan 2017, S.E Primeiru Prezidenti Autoridade RAEOA no ZEESM-TL, Dr Mari Bim Amu de Alkatiri, halo konstrusaun uma troka ho uma, ba komunidade sira nia rezidénsia ne’ebé maka hetan afeta husi konstrusaun moru hosi rezidénsia membru autoridade da RAEOA e ZEESM-TL Fulolo.

Sekretariu Rejional Asuntu Terras no Propriedades António Hermenegildo da Costa, esklarese ba Prezidenti Komisaun C Parlamentu Nasional, ho distinta membru deputadu katak; konstrusaun uma troka uma ho objetivu atu muda komunidade afetadu sira ho dignu ba kondisaun sufisiente.

Uma ne’e hirak ne’e konstrui iha 2017 mandatu S.E Primeiru Prezidenti Autoridade RAEOA no ZEESM-TL, Dr Mari Bim Amu de Alkatiri, iha konkordánsia ida ho afetadu katak uma troka uma no rai troka rai ka halo kompensasaun inklui plantasaun. Nune’e Autoridade konstrui uma kain neen (6) ne’ebé hetan efeitu hosi konstrusaun rezidénsia Autoridade RAEOA no ZEESM-TL, uma neen (6) iha tipu A no tipu B,, enkuantu tipu A unidade ida (1) no tipu B unidade lima (5), ho nia valór orsamentu diferente, tipu A $.19933,18 no tipu B unidade ida (5) $.18737,00 agora dadaun komunidade afetadu hamutuk uma kain tolu (3) maka utiliza ona uma sira ne’e no uma kain tolu (3) seluk maka seidauk utiliza uma sira ne’e, no agora dadaun sei abandona hela.

Vice Prezidente Parlamentu Nasional Maria Terezinha Viegas apresia tebes ho serbisu membru autoridade RAEOA no ZEESM-TL, ne’ebé maka iha vontade no hanoin di’ak ba komunidade ka povu Oé-kusi, liuliu ba komunidade sira ne’ebé hetan afeta husi dezenvolvimentu RAEOA.

Deputada ne’e mós husu ba membru autoridade RAEOA no ZEESM-TL liuliu ba Sekretariu Rejionais Terras no Propriedades tenke halo nafatin komunikasaun ka aproximasaun ho ita-nia komunidade sira, atu nune’e bele utiliza ona uma sira ne’ebé konstrui ona iha tinan 2017, tanba uma ne’ebé mak autoridade konstrui ba komunidade afetadu sira ne’e foin primeira vez implementa iha RAEOA, no mós konstrui uza osan povu nian, fo duni benefísiu ba ita-nia komunidade ka povu sira.

Sekretáriu Rejional Asuntu Terras no Propriedades António Hermenegildo da Costa, promete sei esforsu makas no kontinua halo aproximasaun ho komunidade afetadu hamutuk uma kain tolu (3) atu nune’e sira bele utiliza ka hela ona iha uma hirak ne’e tanba iha 2017 iha konkordánsia hamutuk bele Autoridade deside konstrui uma hirak ne’e maibé to’o komunidade rasik maka lakohi hela fali.